آخر الأخبار

>

 الصفحة الرئيسية    عن الكلية  أقسام الكلية والمقررات
حملة عرفني على اختصاصي

لمحة عن أقسام الكلية في عيون الطلاب والخريجين.. وقد تم نشر المزيد على غروب الكلية الرسمي ضمن #حملة_عرفني_على_اختصاصي

 

 طابت أوقاتكم جميعاً

💜
مُتابع ومسرور جدا لماراثون التعريف بالتخصصات يلي صاير عالغروب هون وكتير حبيت فكرة طرح التجارب العملية من زملائنا لأن هي الأفكار حتساعد كتير طلاب محتارة بتخصصها وكانت كتير قليلة "وموجهة" وقت اخترنا نحنا👌🏻
حابب أدلِ بدلوي أنا كمان لزيادة الفائدة واللي حيكون عشكل 3 مقالات كتبناها السنة الماضية انا وأصدقاء من الطلاب المميزين بتخصصاتهم... وهي المقالات ل3 تخصصات حتكون روابطها بنهاية البوست⚠️
ونصيحتي باختصار لكل الأصدقاء يلي على بوابة الاختصاص؛
أولاً اختارو التخصص يلي بتلاقو فيه رغبتكم وشغفكم لأنو بكل التخصصات حتواجهو عثرات وصعوبات والرغبة هيي الدافع الأكبر لنتجاوزها 💜
لكن: الرغبة أساس مهم جدا لكن لوحدو مو كافي!
لهيك تانيا ومهم جدا تسمعو لأكتر من حدا من جوا التخصصات، وتقرؤو عن طبيعة المواد والمحتوى والمستقبل المهني والاكاديمي وقت تقربو من القرار.. وإياكم تاخدو مشاعر الاشخاص من تجاربهن وإنما ركزو قدر الإمكان عالشي الموضوعي يلي بيوضح معكن من مجموع التجارب 👌🏻
وأخيرا مافي تخصص أفضل من التاني، وإنما في تخصص أنسب الك وطبيعة قدراتك وشخصيتك.. لهيك بغض النظر عن شو حيكون اختياركم لكن اذا وصلتو للقرار الصح حتكونو انتو الأفضل بتميزكم بالتخصص المناسب 💕
يلي بيحب يطّلع على معلومات وتفاصيل هي روابط المقالات:
الأفكار والمعلومات المطروحة ضمن هالمقالات كانت مفيدة كتير بفضل الله لأشخاص كانو على عتبة اختيار التخصص.. واللي دفعني ارجعلهن ونزلهن هوي الfeedback الحلوة يلي وصلتني من الأشخاص يلي قرؤوهن وان شالله تلاقو فيهن شي مفيد يساعدكم بجعل قرار الاختيار أنسب وأصح الكم ولمستقبلكم 👏🏻
لأي سؤال عن اختصاص الإدارة "كونو تخصصي والمقال كتابتي" فأنا جاهز ✌🏻
وشكرا للزملاء Ammar Saati و أمل عيتي للمساعدة بكتابة مقالي الإحصاء والمحاسبة 🌸🌸
وكل الشكر للدكاترة الكرام على هي المساحة الحلوة والفريدة يلي كنا منتمناها من زمان 💕
بالنهاية كل التوفيق لكل حدا فيكن وعقبال التخرج بخطوات مميزة جميعا 🎓💜
 
 
مرحباً...يعطيكون العافية جميعاً...
أنا زميلكن فيصل العلّاف اختصاص إدارة بس ما رح أحكي عن الإدارة ولا حعرفكن عليها 💁‍♂️
حابب أحكي عن بعض المعايير المشوهة عن اختيار التخصص...
-اختيار التخصص ئلو عدة معايير واحد منن هوي الشغف بس مو هوي الوحيد ومو هوي الأهم(وبرأيي ماالو علاقة ابدا)لأنو وهم الشغف مبني عل افتراضات خاطئة منها.... أنو الشغف ثابت وما بيتغير عبر الزمن وهاد شي طبعا خطأ....لأنو حتى لبسك وعلاقاتك وشكلك بيتغير ...تذكر حالك قبل خمس سنين شوف بوستاتك...شوف مين كانو رفقاتك ...
الافتراض التاني أنو عندك شغف واحد ولازم تلاحقو وبعدين تشتغل بشي يلي بتحبو وبتصير ستيف جوبز🙆‍♂️🙆‍♂️🙆‍♂️🙆‍♂️
الزبدة أنو لاتفكر أنو تحب شغلة وأنت مو ممارسها عنجد وعاطيها حقها ...
الشغف ما بيجي قبل العمل...العوائد من التعب هية يلي بتولّد الاهتمام
فا برأيي أحسن شي ممكن تساويه لتعرف شو مجالك
1-تجرّب وتستكشف (تجرب بس مو تجرب شهر زمان☻) لهلئ ما بنسى اول مافتت عالشغل بعد بشهر قررت بططل لانو ماعجبني الشغل ئلي شخص كتير بعزو معي بالشغل أنو حبيبي أنت ما عطيت فرصة لحالك تجرّب🙂 ئلتلو هي جربت شهر ....ضحك ئلي بدك تبطل وأنت لسا ما بتعرف مين مدير مين ومين مأنتم مع مين وكيف بيمشي الشغل؟! وما كذا..والخ
🎯النتيجة أنو أبداً ما تخيلت بهديك اللحظة أني ضل بشغلي 3 سنين و7 أشهر كنت بشركة TBZللمطبوعات والبطاقات كانت مهمتي أشرف عل مطبوعات التجارية يلي بتخص السفارات والشركات تعرفت ععالم من جنسيات مختلفة ونحطيت بضغط اني اتعلم بسرعة ...متل اللغة مثلا وتعلمت من أين تُأكل الكتف وحاليا بشتغل ك freelancer بنفذ مطبوعات دعائية مختلفة
فا عطي حالك فرصة معلش(6 اشهر كافية للتجريب)
2-ركّز و تعلّم ال flexible skills
يلي وين ما بتزتها شغالة ☻ طيب ليش؟ الفكرة من كم يوم كنت عم أقرأ مقال ع Forbes عم يقول أنو بعد ٢٠ سنة رح يختفي أكتر من 40% من الوظائف الحالية ورح تحل محلها وظائف جديدة 🙂
يعني أزا كان من ضمن معاييرك هية "الفرصة" فاا الفرص عم تتغير عل المدى الطويل والقصير حتى ☻
ومن المفاجئ أنو رقم ١ بهي المهارات تبع الزبدية الصيني هية البرمجة 😁 "عفواً من الطبيعي"
3- الخطوة الأخيرة بعد ما جلعصت وخبصت واكتسبت مجموعة من ال skills هاها هوون ممكن هيك وهوي المجال يلي بيأهلك تستخدم الأدوات يلي بين أيديك بعد ما جربت وعرفت شو الشي يلي تأكدت جازما أنو عم يقدم قيمة مضافة لئلك ولمجتمعك .... والحياة حلوة بئا

 

قسم المحاسبة

استكمالاً لما نشرته زميلتنا شام النن مبارح ... حبيت فيدكن اليوم واحكي عن اختصاصي...
الاختصاص الأمتع والأجمل والأكثر طلباً في سوق العمل 😉😉
والفرع يلي بتقدر تثبت حالك فيه وتثبت قوة شخصيتك... يمكن مو انت يلي رح تكون صاحب القرار... بس انت أساس القرار بأيا شركة😇 رح تكون القائد والقبطان يلي سلامة السفينة معتمدة عليك وعلى ذكاءك وعقلك وحساباتك🥰🥰
وطبعاً كل طالب وحسب رغبته و ميوله وشو بحب يكون بالمستقبل ..
موادنا بالسنة التالتة كانوا حلوين وطبعا كلو بقول صعب... بس مافي شي صعب بالدراسة والمتابعة 😊😊 عنا 12 مادة بالفصلين... 6 مواد بالفصل الأول و 6 بالفصل التاني
١- المحاسبة المصرفية : هي مادة بتذكرنا بالقيود يلي اخدناها بالمحاسبة ١و٢ وبتحكي عن كيفية المعالجة المحاسبية في حال اشتغلت بمصرف... مادة سهلة وبدها تركيز وهي مادة مؤتمتة 😊
يتناوب على إعطاء هذه المادة كلاً من الدكتورتين الرائعتين سمر حبيب ومها ريحاوي💙💙
٢- المحاسبة المتوسطة ١ : مادة بتحكي عن الإطار المفاهيمي للمحاسبة وعن القوائم المالية بشكلها التفصيلي... كمان بدها تركيز ومتابعة وكمان مؤتمتة 😁
يقوم بإعطاء المقرر الدكتور عطالله خليل 🌹
٣- محاسبة حكومية : مادة سهلة وفيها قسم نظري كبير .. بتحكي عن القوائم والقيود المحاسبية يلي موجودة بالحكومة (كيفية كتابة القيود بالدولة يعني بوزارة المالية 😅😅) مادة مؤتمتة 😉
يتناوب على إعطائها د.بطرس ميالة و د.محمد خالد مهايني 💙
٤- بحوث العمليات : من أمتع المواد بالكلية بتحكي عن حل المعادلات بأكثر من طريقة وكيفية حل مسائل البرمجة الخطية والنقل والتعيين والشبكات طبعاً كلها مشاكل موجودة بواقع العمل ... كانت السنة الماضية تقليدي وهلق ع حظكن صارت اتمتة😁 انبسطوووووا😍
يقوم بإعطاء المقرر الدكتور المبدع د.منذر عواد 🌹
٥- تطبيقات حاسوب ١ : هي المادة بتحكي عن قائمة التدفقات النقدية باللغة الإنكليزية وعن برنامج الاكسل بالإضافة لجزء نظري .. طبعا ما تخافوا منها لانها بالانكليزي.. بالعكس شوية متابعة مع حفظ شوية مفردات بتلاقي المادة كتير سهلة... كمان مؤتمتة 😇
يقوم بإعطاء المقرر الدكتورة الرائعة هدى روماني 😍
٦- محاسبة تكاليف ١ : المادة الأجمل بين هي المواد مادة سهلة كتير وحلوة بتحكي عن قائمة الدخل بالشركات الصناعية وكل ما يخص الإنتاج التام والإنتاج تحت التشغيل .. كمان مؤتمتة 😉😉
يقوم بإعطائها الدكتور المميز قيس عثمان 💙💙
#بشكل عام مواد الفصل الأول كلها مؤتمتة وبدها تركيز ومتابعة وكلها بتفيدك بالمستقبل المهني🤩🤩
١- محاسبة متقدمة١ :
مادة بدها متابعة وشغل .. لازم تكون كتير منيح بالمحاسبة ١و٢ بتمشي كتير منيح بهي المادة.. طبعا المادة سهلة بس بدها دقة بكل شي... بتحكي عن كيفية زيادة الربحية للمنشأة من خلال أكثر من طريقة متل: مبيعات تقسيط وبضاعة الأمانة والفروع والاقسام .. وهي مادة
مؤتمتة...
يقوم بإعطاء هذا المقرر الدكتور المعروف بشعبيته وابتسامته الدائمة الدكتور عقبة رضا😍
٢- محاسبة ضريبية :
مادة كتير حلوة بتحكي عن التشريع الضريبي و أنواع الشركات وكيف بتخضع للضريبة والاعفاءات الضريبية .. فيها نظري بشكل كبير.. بس النظري يلي فيها هو أساس العملي ولازم تحفظه منيح لتقدر تمشي بالمادة .. (كمان مؤتمتة )
يقوم بإعطاء هذه المادة الدكتور المحبوب د.ابراهيم العدي
٣- محاسبة متوسطة ٢:
فينا نعتبرها من أسهل المواد بتعتمد على المحاسبة ١و ٢ بشكل كتير كبير .. سهلة وسلسلة ودغري بتمشي.. (كمان مؤتمتة )😃
يتناوب على إعطائها الدكتورين المميزين د.ربيع سميا و د.قيس عثمان🌹
٤- تحليل قوائم مالية
مادة ممتعة بتعلمنا كيف تحلل القوائم المالية ونعرف طبيعة المنشأة وقدرتها المالية والنقدية ووضع السيولة فيها .. كتير فيها شي من حياتنا العملية .. بتشبه مبادئ التمويل 😉 مؤتمتة 🧐
يتناوب على إعطائها الدكتورة المحبوبة سمر حبيب والدكتور المبدع ربيع سميا 😍
٥- منهجية البحث العلمي : المادة التقليدية النظرية الكثيفة 😅 بدك تشتغل كتير عالمادة لانها نظري وتقليدي ... طبعا مو حفظية اذا فهمتها مع شوية حفظ بتمشي المادة ..
يقوم بإعطاء هذه المادةالدكتور الرائع عطالله خليل 💙
٦- محاسبة النفط : مادة فيها نظري وعملي بتحكي عن المحاسبة بالمنشآت النفطية وطرق الحصول على البترول والمعالجة المحاسبية لكل مرحلة .. (كمان مؤتمتة )
يقوم بإعطاء هذا المقرر الدكتور شوقي كريم
مواد الفصل التاني مجملاً بدها تركيز ودقة كتير كبيرة لان في حالات كتير .. بدنا نركز عالكلمة... واكيد من اول محاضرتين مع الدكتور عقبة رح تتعلم الدقة على أصولها😁😅 رح تتعلم أنه الغلطة بكفرة عنا بالمحاسبة 😅
وهيك بكون خلصت حكي عن موادنا بالسنة التالتة...
#موادنا بالسنة الرابعة هنن 12 مادة وكلن مواد مؤتمتة ومكملة لكل شي أخدناه بالسنة التالتة..
أما عن الماجستير ... فعنا كذا اختصاص مثل (محاسبة عامة وتدقيق حسابات و.....) ومجالات واسعة كتير...
وما في داعي احكي كتير عن سوق العمل لان الكل بيعرف أكتر اختصاص مطلوب هو المحاسبة... طبعاً ما رح تكون كاشير شاورما متل ما بيحكي البعض😅
طبعاً كلو معتمد على درجة ذكائك وطموحك بس لا تنسى بيت الشعر يلي بقول :
إذا غامرت في شرف ٍ مرومٍ
فلا تقنع بما دونَ النجومِ
 

قسم ادارة الأعمال

أصدقائي طلاب السنة الثانية في منكم كتار ترفعوا و صاروا سنة ثالثة و اكيد محتارين شو تختصوا ..
حبيت فيدكم باختصاصي و شو بعرف عنه و شو حببني فيه
من وجهة نظري هو آحلى فرع لأسباب معينة منها إنه فرع ديناميكي متل ما انت عم تكتسب علم كمان بدك تكون فنان .. فنان بتعاملك مع مشاكلك يلي ممكن تواجهك .. طبعا من خصائص الادارة إنها علم و فن
بالسنة الثالثة ح يكون عندنا 12 مادة موزعين بين 6 فصل أول 4 منهم مؤتمتين هنن:
1️⃣ محاسبة إدارية من أمتع المواد يلي بتحضروها مقسمة بين نظري و عملي و هي آخر مادة محاسبة بتحضروها و طبعا بيعطيها الدكتور المتميز ربيع سميا 💜
2️⃣ التسويق الالكتروني و هي مادة نظرية بتحكي عن عناصر التسويق بس الكترونيا و برافقنا فيها أجمل دكاترة القسم و ألطفهم الدكتورة نهى سعود 💙
3️⃣ التسويق الخدمي مادة سلسة و حلوة كمان نظرية و بتحكي عن عناصر التسويق بس للخدمات هالمرة و ح ينضاف ع الشي يلي بتعرفوه 3 عناصر جديدة ح تتعرفوا ع هالمادة مع الدكتورة ندى العلي 🤍
4️⃣ إدارة البيئة مادة نظرية سهلة بس تحضروها و تكونوا مركزين مع الدكتورة الأكثر من رائعة الدكتورة نسيبة عثمان 💞💓
أما المادتين الباقيين هنن مادتين تقليدي حلوين و قادرين تدرسوهم بس بدهم دقة:
5️⃣ الأساليب الكمية مادة بتتشابه مع مواد غير اختصاصات باسم بحوث العمليات .. مقسمة لنظري و عملي بس النظري فيها فيكم تستنتجوه من العملي و كيفية حل المسائل .. بتتعرفوا على هالمادة مع الدكتور المتميز الدكتور زكوان قريط 💗
6️⃣ ادارة الأعمال الدولية بلغة .. المادة الانكليزية الوحيدة بالسنة كلها مادة ممتعة و ما في داعي تكون لغتك قوية كتير لتقدر تدرسها بتتعرفوا على هالمادة مع الدكتورة الرائعة الدكتورة ردينة محمود 🥰
أما مواد الفصل الثاني كمان هنن 6 مواد و كمان 4 مؤتمتين سهلين و حلوين و كتير كيوت هنن:
1️⃣ سلوك المستهلك مادة حلوة بتعرفكم على اساسيات اتخاذ القرارات بالنسبة للمستهلك الفرد و طبعا بتتعرفوا على هالمادة مع الدكتورة المحبوبة الدكتورة سوزان عبيدو 🥰
2️⃣ نظرية المنظمة مادة نظرية ممتعة بس بدها دقة و انتباه منيح بتتعرفوا عليها مع الدكتورة متميزة الحضور و الاطلالة الدكتورة ريم رمضان ❤️
3️⃣ إدارة الموارد البشرية مادة بتعلمنا مراحل اختيار الموظفين و كيف فينا نختار الموظف الكفوء لنحطه بالمكان المناسب إله بتتعرفوا عليها مع الدكتور المميز الدكتور فداء ناصر 💓
4️⃣ تطبيقات حاسوبية مادة بتحكي عن الاكسل بشكل عام منتعرف فيها على الدوال بالاكسل و آلية عملها .. طبعا منتعرف عليها مع الأستاذ الدكتور حيدر عباس 💕
أما المواد التقليدية و هنن مادتين بيتوزع فيهم العملي و النظري
5️⃣ دراسة الجدوى و منتعرف فيها على مراحلها ما بين الجدوى التسويقية و الفنية و المالية من أمتع المواد يلي منحضرها مع الدكتور مهند أرناؤط 😍
6️⃣ الإدارة المالية مادة منتعرف فيها على كيفية إدارة الاصول المالية من حسابات مدينة و مخزون و رأس المال و النقدية بتتعرفوا عليها مع الدكتورة متميزة الحضور الدكتورة منال صقر ❤️💜
هي لمحة صغيرة عن مواد السنة الثالثة
مواد السنة الرابعة هنن 10 مواد بينهم فقط مادتين تقليدي بالفصل الثاني و مادة انكليزية وحدة ..
5 مواد فصل اول مؤتمتين بالكامل
5 مواد فصل ثاني منهم 2 تقليدي
💕 بالنسبة للماجستير بعدهم (الماجيستير الاكاديمي) هو قسمين إما إدارة أعمال أو تسويق ..
المعدل للقبول عادة ما بكون كتير عالي ..
🌺🌺 المستقبل لهذا الاختصاص
ممكن تكون مدير مالي، مدير موارد بشرية، مدير تنفيذي، ممكن تختص بدراسة الجدوى الاقتصادية و تعمل دراسات للشركات، مدير مبيعات، مدير انتاج ....
و بالتوفيق إلكم جميعاً
إي استفسار خلوه بالتعليقات و جاهزة للرد 💙

 

قسم الاقتصاد

أصدقائي طلاب السنة الثالثة ح نكمل معكم بالاختصاص الرابع يلي فادنا فيه الزميل Mohammed Anwar Obeidو هو:
الفرع ممتع جدا صحيح هو نظري بس مانو نظري ناشف او جامد يعني قائم عالتفكير والتحليل والاستنتاج
بالسنة الثالثة عنا 10 مواد موزعين 5 ب 5 عالفصلين
مادة وحدة مؤتمتة ( تطبيقات حاسوبية ) طبعا هاد مانو سبب للخوف من الاختصاص لانو المواد بشكل عام ممتعة ومو صعبة
الحضور باختصاص الاقتصاد مهم كتير وممتع
1- اقتصاديات الطاقة مادة نظرية سلسلة كتير و بتناقش مواضيع حلوة وقريبة من الواقع واعطاء الدكتور اكتر من رائع
بيعطيها الدكتور زياد عربش
2- علاقات دولية قسمين نظري وعملي ممتعة بتحكي عن علاقات الدول الاقتصادية والتجارية وميزان المدفوعات
بيعطيها الدكتور فادي الخليل
3- قضايا معاصرة مادة نظرية بتحكي عن قضايا اقتصادية عم نعيشا حاليا متل الاصلاح الاقتصادي وغسيل الاموال وهحرة العقول
بيعطيها الدكتور مدين علي
4- ادارة مالية قسمين نظري وعملي المادة كثيفة نوعا ما وبدا شغل ومتابعة مع الدكتورة بتحكي عن ادارة المخاطر المالية للمشاريع وهيكل راس المال ومواضيع كتير تانية
بتعطيها الدكتورة مي مخلوف
5- حسابات قومية مادة عملية ونظرية بتحكي عن كيفية حساب الدخل والناتج القومي والجغرافي بشكل مفصل
بيعطيها الدكتور محمود زنبوعة (القسم النظري) والدكتور محمود بوادقجي (القسم العملي)
....
1- اقتصاد رياضي مادة عملية وممتعة كتير بتحكي عن نظرية الالعاب ونظرية القرارات
بيعطيها الدكتور ياسر مشعل
2- دراسة جدوى مادة عملية ونظرية بتحكي عن دراسة الجدوى الاقتصادية للمشاريع وخطواتا والمعلومات والبيانات اللازمة لكل خطوة
بيعطيها الدكتور رسلان خضور (قسم الدراسة التسويقية والدراسة الفنية) والدكتورة الاء بركة (باقي اقسام المادة)
3- تنمية وتخطيط مادة نظرية التنمية بتحكي عن التنمية الاقتصادية والنمو الاقتصادي والفرق بيناتون التخطيط بتحكي عن التخطيط واهميتو واشكالو ونشأة التخطيط
بيعطيها الدكتور مدين علي (قسم التنمية) والدكتور مظهر يوسف (قسم التخطيط)
4- تطبيقات حاسوبية المادة الوحيدة المؤتمتة بتحكي عن قواعد البيانات والبرمجيات المستخدمة بانشاء قواعد البيانات (اكسسز)
بتعطيها الدكتورة انمار عرابي
5- تكتلات اقتصادية مادة نظرية بتحكي عن التكتلات الاقتصادية الدولية متل الاتحاد الاوروبي ودول البريكس والنافتا والمزيد
بيعطيها الدكتور معتز نعيم
....
وبالنسبة لمواد السنة الرابعة كمان 10 مواد 5 ب 5
مادة وحدة مؤتمتة ومادة باللغة الانكليزية
 

قسم الإحصاء التطبيقي

رح احكي ووضح شوي عن قسم الاحصاء التطبيقي و يلي معظم الطلااب بيخافو منو و ما بيعرفو عنو شي غير بعض الاشاعات و هاد القسم و الاختصاص يلي غايب كتير عن الطلاب نقاط قوته و مدى اهميتته بالنسبة لقسم الإحصاء .. كمواد رائع ... أغلب المواد عملية ومافيا حفظ وبصم .... الجانب العملي و التحليلي غالب على جميع المواد، و الجوانب النظرية موجودة لكن اقل و**امتحانات المواد كلها تقليدي**
طبعاًَ مو ضروري تكون كتير خارق بالرياضيات لتقدر تكمل، بس بيلزمنا الاساسيات يلي متعلمينا سابقاً........
مستقبلو الأكاديمي ممكن يكون مفتوح، بمعنى ممكن نكمل ماستر ودكتورا ..... الاهتمام فيه بالجامعة من حيث الورشات التدريبية مقارنة بباقي الاختصاصات اكتر من غيرو .....
بالنسبة لفرص العمل بشكل عام هي أقل مقارنة بباقي الاختصاصات بس هاد الشي بيتناسب مع أعداد خريجي القسم وبين الفرص المتاحة
نظرياً مجال عمله كبير وكبير كتير ..
يعني ممكن كمحلل احصائي واذا معك شهادات وعلم ولقيت فرصة، أمورك بتكون تمام التمام وممكن تكون أمروك احسن من مدير مالي مثلا .
الامورر يلي بيشتغل فيها هي تحليل المعطيات والبيانات ومجالات التخطيط االاستراتيجي دراسات السوق والتسويق ودراسات الجدوى الاقتصادية اضافة لمجالات العمل بالبحث العلمي وهي كتيرررة كتير ... اثناء الدراسة ممكن تشتغل أستاذ وتعمل دورات إذا عندك موهبة التدريس.
حالياً المناصب المتعلقة بخريجين قسم الإحصاء (عالمياً) هي من اوائل المناصب (طبعاً هاد الكلام مو من عندي بشوية بحث بسيط ممكن نتأكد من هاد الشي).
ممكن نقول بسوريا، الوضع صار مختلف عن قبل، كتير شركات كبرى، ومنظمات صارت بحاجة لـ محللين بيانات (طبعاً اسم الشاغر ممكن يتيغير على حسب طبيعة المنظمة او الشركة). أهمية البيانات وكيفية إدراتها واستخراج المعلومات المهمة واكتشاف الانماط يلي ما بتطلع او بتنعرف بالطرق التقليدية صار جزء لا يتجزأ من أي عملية بتقوم فيا أي شركة..
 
طبعاً في حكي كتير كمان بس لا يمكن حصره ب بوست صغير وممكن بالاخير اذكر مصطلحات يلي حابب يقرا ويعرف اكتر يعمل بحث ويشوف هل الشغلات الرهيبة (Machine Learning, Data science, Data Visualization)
===
وددت اليوم أن أحدثكم عن تخصصي 😄
أنا دعاء طالبة دراسات عليا - مرحلة الرسالة تخصص أساليب كمية - إحصاء تطبيقي ✨
قد لا يسعني هنا التحدث باستفاضة عن الإحصاء كعلم ..
لكن حتماً بوسعي أن أحدثكم عن الإحصاء كشغف ..!
بدايةً
و قبل أن تفكر في المرور على قسمنا، موطننا ومحل إقامتنا الدائم 😌 ..
أهلاً بك 😍😉
أريد فقط أن أخبرك:
أن اختيار تخصص أياً كان يعني أن تضحي بالبقية لأجل أن تهب نفسك لواحد !
لكن هذا لا يعني أن شغف المعرفة لا يهدى لسائر التخصصات ! ✨
ثم إن علم الإحصاء الذي وهبته نفسي، ليس بالعلم المستحيل الذي يعجزك، ولا بالدرب المعبّد بالورد ليعجبك .. !
لكنه علم حر .. يفتح لك أفاق واسعة في زمن باتت الثروة فيه: فكر تحليلي وحزم برمجية وعدد هائل من البيانات ..
كل مافي الأمر:
قليل من الجهد المضاعف، الحضور الدائم، المثابرة، والصبر،
ومواد تقليدية 100% و اكتب 😅
"أهمية المعرفة بعلم الإحصاء أصدقائي لا تنحصر على المتخصصين و الراغبين بتطبيقه في مجال دراساتهم فقط، بل يمتد ذلك إلى كل باحث وطالب علم ."
وتزداد أهميته كلما تقدمت في مسيرتك العلمية الأكاديمية أو المهنية ..
✨ الإحصاء كفكرة عامة بسيطة هو علم بقدم حسابات دقيقة لظواهر مختلفة ليوصل بالنهاية لقرار سليم يخدم الظاهرة المدروسة أو يقدم حل لمشكلة فيها ..
هذه الحسابات ليست عمليات جمع و طرح ووو
بل تعتمد هذه الحسابات على عملية جمع البيانات وتحليلها ودراسة سلوكها باستخدام الأدوات الإحصائية المناسبة ثم عرضها واستخلاص النتائج منها للوصول للقرار السليم .
أما عن الإحصاء ✨ كمواد سنة ثالثة:
فعدد المواد بكل فصل 6 مواد
كلها مواد جميلة وأساسية ومافي شي منها صعب
و في عنا مواد مشتركة مع بقية التخصصات 📚 وهذا وإن دل فإنه يدل على ارتباط الإحصاء ببقية التخصصات 😉
مواد الفصل الأول:
- عينات إحصائية
- خوارزميات إحصائية
- بحوث العمليات
- احتمالات
- اقتصاد رياضي
- حسابات قومية مادة مشتركة مع قسم الاقتصاد .
مواد الفصل الثاني :
- اقتصاد قياسي✨
- إحصاء لامعلمي المادة الوحيدة باللغة الإنجليزية
- إحصاء اجتماعي واقتصادي
- نظرية القرارات الإدارية
- نظم معلومات جزء منها مشترك مع قسم المصارف
- إدارة مالية مادة مشتركة مع قسم الإدارة .
و لا تنسوا فكرة أن امتحاناتنا تقليدية بشكل كامل 😅
بس لا ترتعبوا بالعكس هذا كتير شي إيجابي وعظيم وزاد من كفاءتنا بدراسة المواد بشكل كبير .. ومن قدرتنا على إعادة صياغة المعلومة بطريقة مختلفة
مارح أحكي عن ميزات التخصص لأنه هو بحد ذاته مميز ! 🌟
عددنا بالدفعة صح قليل، لكنه كان إيجابي بتلقي المعلومة و مناقشتها مع الدكاترة وبقية زملائنا ..
نحن مو بس دفعة صغيرة، نحن عيلة ♥️
✨الإحصاء كمستقبل حدث ولا حرج:
فينا نقول أن العالم مو بس متجه -هو اتجه وخلص- نحو كم هائل من البيانات، لكن جمع هذه البيانات لن يكون ذا مغزى إذا لم يتم تحليلها واستخلاص منها نتائج !
وهنا يأتي دور الإحصاء كأداة لتحصيل هذه النتائج وتفسير الأرقام التي يبنى عليها قرارات في غاية الأهمية في شتى المجالات المختلفة .. انطلاقاً من أدق تفاصيل حياتنا اليومية
على سبيل المثال:
- اختيارك لوجبة معينة وتذوقها (عينة) تستطيع (الاستدلال) منها على ملح أو طعم الوجبة كلها (مجتمع) 😅
- ساعات النوم المقدرة بثمان ساعات يومياً (متوسط)
وزيادة ساعة أو نقصان ساعة ليلة الفحص (انحراف)
- تخفيف سرعة مكرو الباص صباحاً قرب الموقف (اتخاذ قرار) لأنه يعلم (بيانات) أنه من الممكن تواجد ركاب (تنبؤ) 😉
- لما بتسأل حدا عن التخصص بقول لك أغلب (منوال) الطلاب بتسجل محاسبة 🤷🏼‍♀️
- إنك تاخذ إجراءات السلامة لما تنزل تداوم حتى لا سمح الله ما تنعدى هذا (ارتباط) .
- آخر امتحان قدمته كنت عم تسعى فيه (لأقل عدد من الأخطاء) وبتطلع حاطط ببالك (95% مستوى ثقة) ناجح 💪🏻
والأمثلة على بساطتها كتير ..
والإحصاء على أهميته أعمق أكثر من هيك بكتير
✨الإحصاء كعمل: في كل مكان عمل سواء كان إداري، صحي، بحث علمي ...... إلخ هناك إحصائي اطمن 😉😌 بس للأمانة في بلدنا متناسب مع عدد الخريجين ..
لكن تأكد أن المستقبل لك ✨
والتعلم الذاتي مفتاحك .. أنت بحاجة مثل أي تخصص آخر، تزيد مهاراتك وتتعلم خارج أسوار جامعتك ..
الإحصاء كتير شغلات ما طلع بإيدي أحكيها لكم كلها، لكن لا تترددوا تعملوا لي منشن بأي سؤال ممكن يخطر على بالكم..
أساتذتي بالقسم مشكورةً جهودهم ..
وأنا وزملائي بالدفعات المختلفة أكيد مارح نقصر بالإجابة عن أي استفسار بخطر ببالكم😍👇🏻
💡و إذا عندكم شغف تعرفوا عن الإحصاء أكثر هذه بعض المقالات المفيدة 📃 ممكن نترك لكم روابطها بالتعليقات ..
و قبل أن أختم ، لأنه بكفي طولنا 😅
نصيحة ..
باختيارك لتخصصك لا تختار التخصص اللي الاقبال عليه أكبر وفرص العمل فيه أكثر ووو
صح هدول بناخذهم بعين الاعتبار .. لاشك
لكن من وجهة نظري بحكي لك اختر "الدرب الأكثر متعةً"
أنت وين بتلاقي حالك وبتحب تكون !
اختر لنفسك دائماً أكثر طريق تستمتع وبتحب تتعلم فيه لأنك حتماً رح تبدع فيه و توصل لهدفك وتقدر تضيف شيء لوطنك !
أو تعلم تحب التخصص اللي اخترته بناءً على أي معاير أخرى .. لأنه رح يكون هالشغف جذوة شعلتك لتواصل مسيرتك وتحقق أهدافك وترتقي بنفسك على الصعيد العلمي أو المهني 💪🏻
ثاني شغلة والأخيرة 😄
عم نتعلم ونتعلم ، ومحسوبة هالسنوات الجامعية من عمرنا ومحسوبة ..
خلونا نتعلم فيها صح !
وهالشهادة اللي كلنا عم نسعى لها وناطرين التخرج لنفرح فيها
خلينا نبني فيها أنفسنا و حياتنا اليومية قبل ما نكتبها ب الcv و نركض فيه للشركات لتوظفنا وعلى أساس نحن هيك عم نأدي فيها واجبنا ونبني فيها وطننا !
لأنه بالنهاية فاقد الشي لا يعطيه !
شو فائدة العلم إذا ما انعكس على سلوكنا و تعاملاتنا وحياتنا !
شو فائدة الشهادة إذا ما كنت أنت شاهد بها على نفسك أولاً !
..
خلي هالسنة انطلاقة جديدة ، استغلها صح ✨
ابذل جهدك و تعلم لتبني نفسك أولاً
تعلم لتجعل المكان اللي أنت فيه أفضل !
أرجوك تعلم واستفيد و فيد صح 💛✨
اختيار موفق و عام مليء بالنجاحات يا أصدقاء ..
دعاء ..
 

 

=====

قسم المصارف والتأمين

مرحبا جميعاً
زملائي وأصدقائي الأعزاء ...
بدايةً حابب عرفكن عن نفسي
أنا ماهر الشعار، خريج كلية الاقتصاد، جامعة دمشق إختصاص المصارف والتأمين
دخلت سوق العمل لمدة 5 سنوات
وتنوع مجال عملي بين عدة شركات وتخصصات
بداية طريقي المهني كانت بالسنة الثالثة لما بلشت مع شركة الخازن كمدقق حسابات وخبير دعم فني
وبعدا إنتقلت لشركه راماك (سيرياتيل) بمنصب محاسب تكاليف، وبنفس الوقت إشتغلت كمدرب ICDL وإكسل متقدم مع الأونروا
وحالياً عم اعمل ماستر بروسيا وناوي بعد الماستر كمل دكتوراه إنشالله❤️
هالبوست حابب وجهه لزملائي الاقتصاديين يلي ترفعو عالسنة عالتالتة وحابين يختصو وكلنا منعرف قديش هالمرحلة مهمة وحساسة ومفصلية بحياة طالب الاقتصاد لأنها بتلعب دور كتير كبير بتوجيه مساره المستقبلي سواء الأكاديمي أو المهني.....
انا ما رح اشرح عن ولا تخصص وقلكن انو هو الافضل
بس رح احكيلكن عن حالي و تجربتي كطالب وخريج من قسم المصارف والتأمين
أغلب الطلاب و منهن أنا
وقت نطلع من السنه التانية
منواجه السؤال التالي:
شو بدي اختص ؟؟
وانو أختصاص أحسن؟؟
و الكل بيجاوب حسب تخصصو وحسب وجهة نظر!!
انا رح احكيلكن عن فرع المصارف من خلال تجربتي و من الشي يلي واجهتو ب سوق العمل....
أهمية اختصاص #التأمين_و_المصارف
اومايعرف ب #Finance :
➖ -في عالم الاقتصاد و الأعمال:
يعتبر التّمويل وطريقة إدارة الأموال بمثابة شريان الحياة للمُنشآت على إختلاف أَنشطتها
➖ - من حيث الحداثة والأهمية:
يعتبر من التخصصات الحديثة وهو من أهم التخصصات حيث له عدة برامج ماستر ودكتوراه موزعة على مختلف الجامعات الحكومية والخاصة سواء داخل سوريا أو خارجها.
(وكمان المتخرج عندو مجالات تانية بيقدر يدرس فيا بعد التخرج غير الماستر وياخد فيها شهادات عالمية متل CFA, CMA, ...
وما لازم ننسى إنو إتمامك لإحدى هدول كفيل يقويك كتير بالمجال العملي ويقدملك عمل بمكانة مرموقة وراتب عالي (سواء كان شغلك جوا البلد أو برا)
➖ - من حيث المواد المدروسة:
👈-يعتبر من التخصصات الممتعه للطلبة فهو من التخصصات التي تعتمد على الفهم والتحليل أكثر من اعتماده على الحفظ.
👈-المواد فيها تنوع بين مواد مصرفية تخص البنوك والسياسات المالية والمصرفية، ومواد تخص التأمين، مواد إدارية، ومواد محاسبية، ومواد تخص النظم، ومواد تحليلية (وخصوصاً التحليل المالي والنسب المالية للمنشآت)
وبإمكاننا القول إن المواد ممتعة وأغلبها تحليلة ومفيدة جداً لسوق العمل (فمثلا مادة المصارف الاسلامية لوحدها كافية أن تغطي جميع الجوانب التي يجب أن يتعملها موظف بنك إسلامي؛ ومادة التحليل المالي كافية لتجعلك قادراً على التحليل المالي لأي منشأة واستخلاص نتائج مهمة من التحليل والوصول لتوصيات وحساب نسب المنشأة كافة)
- وهذا كله يعطي الطالب حافزاً لتكوين معلومات اكبر عن التخصص والتعمق فيه؛ حيث أنَّ كل مادة في هذا التخصص ستجدها بعد التخرج عالماً آخر وتخصص واسع؛ بالإضافة إلى الأمور المالية يحتاج إليها الفرد والشركات وأنها امور متجددة ومتطورة باستمرار.
هيك منكون لخصنا فوائد وأهمية الاختصاص بشكل سريع بس في ملاحظة مهمة حابب احكيا واللي هي
إنو بهاد التخصص تحديداً مرجعك الأهم هو الكتاب ثم الكتاب وحضورك مفيد جدا وكلشي بتقرئه بهاد التخصص و بتكتسبه من الدكاتره و الحضور رح تستفيد منو وتلاقيه لبعدين.. لأن هالتخصص موجود بكل المجالات ..
السؤال التالي بينطرح كتير
هل بعد التخرج رح كون جاهز لأدخل سوق العمل فوراً ؟
اكيد لا لأن عالم التمويل هو كبير و حديث و يتطور بإستمرار.. وبيستمد أهميته و تطوره بربطه بالتقانة و الذكاء الاصطناعي لهيك يعتبر إختصاص المستقبل.
ولهيك لازم نكمل حالنا ببعض الكورسات و الدورات يلي ممكن نتلقاها اون لاين و مجاناً عبر العديد من المنصات التعليمية
والأهم منها ويلي لازم تحصلها قبل التخرج :
* احترف الأوفيس عموماً و الإكسل و الأكسس خصوصاً
* الإكسل المتقدم و المالي بإستخدام vba
* الأكسس بإستخدام SQL (مقرر تطبيقات حاسوبيه )
* التحليل المالي و المحاسبة المتوسطة باللغه الإنجليزية (مقرر Financial analysis)
* و اللغه الانجليزية بشكل عام والإنكليزية التخصصية بشكل خاص.
سؤال آخر:
ما هي مجالات عمل تخصص التأمين و المصارف //التمويل// ..؟؟ 🤔


شعار كلية الاقتصاد

مقالات

إعلانات وأخبار

الرئيسية

حول الكلية

الاستبيانات

الشكاوي

الأسئلة المتكررة

روابط هامة

اتصل بنا

عداد الزوار / 8607689 /

Damascus University @ 2024 by SyrianMonster | All Rights Reserved